(अहिल्यानगर खबरबात न्यूज नेटवर्क)
राहाता – धरणे पूर्ण क्षमतेने भरलेली असली, तरी लाभक्षेत्रातील नागरिकांच्या व शेतीच्या गरजा लक्षात घेऊन उपलब्ध पाणीसाठ्याचे अत्यंत काटकसरीने व योग्य नियोजन करणे गरजेचे आहे. सर्वांनीच पाण्याचा वापर काटकसरीने करावा, असे आवाहन राज्याचे जलसंपदामंत्री तथा जिल्ह्याचे पालकमंत्री डॉ. राधाकृष्ण विखे पाटील यांनी केले.
दारणा प्रकल्पावरील गोदावरी कालव्याच्या सन २०२६-२७ मधील रब्बी व उन्हाळी हंगामातील पाण्याचा सुयोग्य वापर आणि संभाव्य आवर्तनाच्या नियोजनासंदर्भात राहाता येथील कुंदन लॉन्स येथे जलसंपदामंत्री तथा पालकमंत्री डॉ. राधाकृष्ण विखे पाटील यांच्या अध्यक्षतेखाली कालवा सल्लागार समितीची बैठक झाली. या बैठकीत आगामी रब्बी व उन्हाळी हंगामातील संभाव्य आवर्तनाचे वेळापत्रक सादर करण्यात आले.
अधीक्षक अभियंता राजेश गोवर्धने यांनी आवर्तनाच्या संभाव्य नियोजनाची सविस्तर माहिती दिली. त्यानुसार रब्बी हंगामासाठी १ डिसेंबर २०२६ ते ३० डिसेंबर २०२६ या कालावधीत ३० दिवसांचे आवर्तन प्रस्तावित करण्यात आले आहे. या कालावधीत सिंचन व बिगर सिंचनासाठी २.६२० टीएमसी पाणी वापराचे नियोजन करण्यात आले आहे.
उन्हाळी हंगामासाठी तीन टप्प्यांत एकूण ४८ दिवसांचे आवर्तन प्रस्तावित करण्यात आले असून, या हंगामासाठी एकूण ५.१८८ टीएमसी पाणी वापराचे नियोजन करण्यात आले आहे. पहिला टप्पा १ मार्च २०२७ ते २२ मार्च २०२७ या कालावधीत २२ दिवसांचा असून, त्यासाठी २.४३ टीएमसी पाणी वापराचे नियोजन करण्यात आले आहे. या टप्प्यात मर्यादित सिंचन व बिगर सिंचनासाठी पाणी उपलब्ध असेल.
दुसरा टप्पा ५ मे २०२७ ते १७ मे २०२७ या कालावधीत १३ दिवसांचा असून, त्यासाठी १.४३ टीएमसी पाणी वापराचे नियोजन करण्यात आले आहे. या टप्प्यात बिगर सिंचनासाठी पाणी उपलब्ध असेल. तिसरा टप्पा १० जुलै २०२७ ते २२ जुलै २०२७ या कालावधीत १३ दिवसांचा असून, त्यासाठी १.३२८ टीएमसी पाणी वापराचे नियोजन करण्यात आले आहे. या पाणीवाटप नियोजनास कालवा सल्लागार समितीने मान्यता दिली.
यावेळी पालकमंत्री डॉ. राधाकृष्ण विखे पाटील म्हणाले की, शेतकऱ्यांना विविध कामांसाठी शासकीय कार्यालयांत वारंवार चकरा माराव्या लागू नयेत, यासाठी जलसंपदा विभागाचे कामकाज जलदगतीने आणि ऑनलाइन करण्यावर भर द्यावा. शेतकऱ्यांना त्यांच्या अर्जांची व कामांची माहिती थेट मोबाईलवर उपलब्ध व्हावी आणि विविध डिजिटल सेवा सुलभतेने मिळाव्यात, यासाठी प्रशासकीय पातळीवर कार्यवाही सुरू असल्याचे त्यांनी उपस्थित शेतकरी बांधवांना सांगितले.या बैठकीला आमदार आशुतोष काळे, आमदार हेमंत ओगले, माजी आमदार स्नेहलता कोल्हे, अपर जिल्हाधिकारी शैलेश हिंगे, अधीक्षक अभियंता राजेश गोवर्धने, तहसीलदार अमोल मोरे, तालुका कृषी अधिकारी आबासाहेब भोरे, गटविकास अधिकारी विवेक गुंड यांच्यासह जलसंपदा विभागाचे अधिकारी, कर्मचारी व लाभधारक शेतकरी उपस्थित होते.
