शरद क्रीडा महोत्सवात चितळी महाविद्यालयातील मुलींच्या कबड्डी संघाचे उपविजेतेपद

(अहिल्यानगर खबरबात न्यूज नेटवर्क)

चितळी – रयत शिक्षण संस्थेचे न्यू इंग्लिश स्कूल, चितळी व कनिष्ठ महाविद्यालय येथील 17 वर्षांखालील मुलींच्या कबड्डी संघाने शरद क्रीडा महोत्सवात उत्कृष्ट कामगिरी करत उपविजेतेपद पटकावले. रयत शैक्षणिक संकुलांतर्गत बोरावके महाविद्यालय, सी. डी. जैन कॉलेज ऑफ कॉमर्स व स्वामी सहजानंद भारती बी.एड. महाविद्यालय यांच्या संयुक्त विद्यमाने तसेच रयत शिक्षण संस्थेच्या मॅनेजिंग कौन्सिल सदस्या मीनाताई जंगधने यांच्या मार्गदर्शनाखाली पद्मविभूषण शरदचंद्रजी पवार साहेब यांच्या 85 व्या वाढदिवसानिमित्त कबड्डी व खो-खो स्पर्धेचे आयोजन करण्यात आले होते.

या स्पर्धेत रयत शिक्षण संस्थेच्या न्यू इंग्लिश स्कूल, चितळी व कनिष्ठ महाविद्यालय येथील 17 वर्षांखालील मुलींच्या कबड्डी संघाने बोरावके महाविद्यालयाशी झालेल्या अत्यंत चुरशीच्या सामन्यात दमदार खेळ सादर केला. संघातील सिद्धी वाघ, श्रद्धा वाघ, देवयानी कातोरी, वैष्णवी चौधरी, अनुष्का वाघ व आकांक्षा गुंड यांनी उत्कृष्ट डावपेच दाखवत द्वितीय क्रमांकाचे बक्षीस पटकावले.

या यशाबद्दल संबंधित न्यू इंग्लिश स्कूल, चितळी व कनिष्ठ महाविद्यालयाच्या स्थानिक स्कूल कमिटी, सल्लागार समिती, शालेय व्यवस्थापन समिती, शिक्षक-पालक संघ, प्राचार्य नामदेव शिरसाठ, पर्यवेक्षिका सौ. सातव, क्रीडा शिक्षक अरुण झुराळे,सर्व शिक्षकवृंद तसेच ग्रामस्थांनी विजेत्या संघाचे अभिनंदन केले आहे.