(अहिल्यानगर खबरबात न्यूज नेटवर्क)
राहाता – शिर्डी लोकसभा मतदारसंघातील राहाता तालुक्यातील मौजे जळगाव गावातील तीन महत्त्वाच्या रस्त्यांच्या कामांना जिल्हा वार्षिक योजना सन 2024-25 अंतर्गत प्रशासकीय मान्यता मिळाली असल्याची माहिती शिर्डीचे खासदार भाऊसाहेब वाकचौरे यांनी माहितीपत्रकाद्वारे नुकतीच दिली आहे.
खासदार वाकचौरे यांनी माहितीपत्रकात नमूद केले आहे की, जिल्हा वार्षिक योजना 2024-25 अंतर्गत मौजे जळगाव गावातील खालील तीन रस्त्यांच्या मजबुतीकरणाच्या कामांना प्रशासकीय मान्यता प्राप्त झाली आहे. यामध्ये मौजे जळगाव ते लालवाडी रस्ता, तसेच जुना खैरी रोड (महेंद्र चौधरी) यांच्या घरापासून ते (संजय वाघ यांचे घर) रेल्वे चौकीपर्यंतचा रस्ता व पुणतांबा-जळगाव प्रजिमा 11 चितळी स्टेशन मार्ग (जळगावपासून) या रस्त्यांचा समावेश आहे.
या तीनही रस्त्यांच्या कामांमुळे परिसरातील ग्रामस्थांना मोठा दिलासा मिळणार असून, वाहतुकीची सोय अधिक सुलभ आणि सुरक्षित होईल. गावातून जाणाऱ्या प्रमुख मार्गांवरील अडथळे दूर होऊन शेतकऱ्यांना, विद्यार्थ्यांना तसेच सामान्य नागरिकांना मोठा फायदा होणार आहे.खासदार वाकचौरे यांच्यासह या विकासकामांसाठी सहकार्य केलेल्या सर्व संबंधित विभागांचे ग्रामस्थांनी आभार मानले असून, मंजूर झालेल्या सर्व कामांची दर्जेदार होईल असा विश्वास व्यक्त केला आहे.
यावेळी जेष्ठ नेते गंगाधर चौधरी, उद्धव बाळासाहेब ठाकरे शिवसेना गटाचे तालुका उपप्रमुख बाबासाहेब चौधरी, विजय चौधरी, डॉ. गोरख चौधरी, मच्छिंद्र भवर आदी ग्रामस्थ उपस्थित होते.
