(अहिल्यानगर खबरबात न्यूज नेटवर्क)
श्रीरामपूर – दुष्काळी परिस्थितीमुळे शेतकरी आधीच आर्थिक संकटाचा सामना करत असताना दिवाळीच्या तोंडावर राहाता तालुक्यातील वाकडी येथे शेतमाल चोरीची घटना घडली आहे. गुरुवारी (दि. ५ नोव्हेंबर) पहाटे पाच वाजण्याच्या सुमारास शेतकरी वसंत पुंजा जाधव यांच्या घरासमोरील पडवीत साठवून ठेवलेले १७ कट्टे आणि दोन लहान गोण्यांमधील सुमारे ५५ हजार रुपये किमतीचे सोयाबीन अज्ञात चोरट्यांनी चोरून नेले. या घटनेमुळे वाकडी परिसरातील शेतकऱ्यांमध्ये चिंता व्यक्त होत आहे.
वाकडी येथील वसंत जाधव यांच्याकडे पाच एकर शेती असून, यंदा त्यांनी सोयाबीनचे पीक घेतले होते. काढणीनंतर तयार झालेले सोयाबीन त्यांनी सहा ते सात दिवसांपूर्वी घरासमोरील पडवीत १७ कट्टे आणि दोन लहान गोण्यांमध्ये भरून ठेवले होते. सध्या बाजारभाव कमी असल्याने त्यांनी सोयाबीनची विक्री केली नव्हती. मात्र, योग्य भाव मिळण्याच्या प्रतीक्षेत घरासमोर साठवून ठेवलेला शेतमालच चोरीला गेल्याने त्यांचे मोठे आर्थिक नुकसान झाले आहे. याबाबत श्रीरामपूर ग्रामीण पोलीस ठाण्यात तक्रार दाखल करण्यात आली आहे.
बुधवारी (दि. ४ नोव्हेंबर) रात्री दहा वाजता जाधव कुटुंबीय जेवण करून झोपले होते. गुरुवारी पहाटे पाच वाजता वसंत जाधव घराबाहेर आले असता पडवीत ठेवलेल्या सोयाबीनच्या गोण्या गायब असल्याचे त्यांच्या निदर्शनास आले. त्यांनी पत्नी आणि मुलासह परिसरात शोध घेतला; मात्र सोयाबीनचा काहीच ठावठिकाणा लागला नाही.
यानंतर जाधव यांनी आपले लहान भाऊ रवींद्र यांच्याशी संपर्क साधला. त्यावेळी रात्रीच्या सुमारास त्यांच्या वस्तीच्या परिसरात एका वाहनाची ये-जा सुरू असल्याचे त्यांनी सांगितले. त्यामुळे अज्ञात चोरट्यांनी वाहनातून सोयाबीन चोरून नेल्याचा संशय व्यक्त करण्यात येत आहे. याप्रकरणी वसंत जाधव यांनी पोलिसांत अज्ञात चोरट्यांविरुद्ध फिर्याद दाखल केली आहे.घटनेची माहिती मिळताच तपासी अंमलदार हेड कॉन्स्टेबल रामेश्वर ढोकणे पोलीस कर्मचारी शुभम खोमणे यांनी गुरुवारी (दि. ५ नोव्हेंबर) घटनास्थळी भेट देऊन पाहणी केली. तसेच चोरी झालेल्या ठिकाणाचा पंचनामा केला. या प्रकरणाचा पुढील तपास पोलिसांकडून सुरू आहे.
दुष्काळात कष्टाने पिकवले, चोरट्यांनी लंपास केले!
एकीकडे पावसाच्या अनिश्चिततेमुळे आणि शेतीतील वाढत्या खर्चामुळे शेतकरी आर्थिक अडचणीत आहेत. त्यातच शेतमालाला अपेक्षित बाजारभाव मिळत नसल्याने अनेक शेतकरी योग्य भाव मिळण्याच्या प्रतीक्षेत असतात. अशा परिस्थितीत कष्टाने पिकवून घरासमोर साठवून ठेवलेला शेतमालच चोरीला गेल्याने शेतकऱ्यांच्या अडचणीत आणखी भर पडली आहे. दिवाळीच्या सणाच्या तोंडावर घडलेल्या या घटनेने वाकडी परिसरात हळहळ व्यक्त होत आहे.
