(अहिल्यानगर खबरबात न्यूज नेटवर्क)
कोपरगाव – कोपरगाव तालुक्यातील नागरिकांना दर्जेदार आणि वेळेत आरोग्य सुविधा उपलब्ध व्हाव्यात, यासाठी कोपरगाव येथे ट्रामा केअर युनिट सुरू करण्यास मंजुरी द्यावी, तसेच कोपरगाव उपजिल्हा रुग्णालयात अत्याधुनिक ‘महा लॅब्स’ सुविधा सुरू करावी, अशी मागणी आ. विवेक भैय्या कोल्हे यांनी केली आहे. ट्रामा केअर युनिटच्या मागणीची दखल घेत मुख्यमंत्री देवेंद्र फडणवीस यांनी संबंधित विभागाला तात्काळ प्रस्ताव सादर करण्याचे निर्देश दिले आहेत.तर ‘महा लॅब्स’ सुविधा सुरू करण्यासाठी आ. कोल्हे यांनी आरोग्यमंत्री प्रकाश आबिटकर यांच्याकडे पाठपुरावा केला आहे.
कोपरगाव तालुक्यातून समृद्धी महामार्ग, राष्ट्रीय महामार्ग क्रमांक ७५२-जी, ७५२-आय आणि १६० यांसह विविध राज्य महामार्ग जातात. या मार्गांवर वारंवार अपघात होत असल्याने अपघातग्रस्तांना तातडीने वैद्यकीय उपचार मिळणे आवश्यक आहे. अपघातानंतर पहिल्या तासात योग्य उपचार मिळाल्यास रुग्णांचे प्राण वाचण्याची शक्यता वाढते. त्यामुळे कोपरगाव येथे ट्रामा केअर युनिट सुरू करण्यासाठी शासनाने तातडीने मंजुरी द्यावी, अशी मागणी आ. विवेक भैय्या कोल्हे यांनी केली आहे.
कोपरगावपासून शिर्डी अवघ्या १२ किलोमीटर अंतरावर आहे. या परिसरातून मोठ्या प्रमाणावर वाहतूक होत असल्याने अपघातग्रस्तांना तातडीने उपचार देण्यासाठी स्वतंत्र ट्रामा केअर युनिटची आवश्यकता आहे. या युनिटला मंजुरी मिळावी, यासाठी आ. विवेक भैय्या कोल्हे यांनी शासनदरबारी अनेक वेळा पाठपुरावा केला आहे. त्यांच्या मागणीची दखल घेत मुख्यमंत्री देवेंद्र फडणवीस यांनी संबंधित विभागाला तात्काळ प्रस्ताव सादर करण्याचे निर्देश दिले आहेत. त्यामुळे या मागणीच्या अनुषंगाने पुढील कार्यवाही होण्याची अपेक्षा आहे.
कोपरगाव उपजिल्हा रुग्णालयात अत्याधुनिक ‘महा लॅब्स’ सुविधा सुरू करण्यासाठीही आ. विवेक भैय्या कोल्हे यांनी पुढाकार घेतला आहे. यासंदर्भात त्यांनी सार्वजनिक आरोग्य व कुटुंब कल्याण मंत्री प्रकाश आबिटकर यांच्याकडे मागणी करून पाठपुरावा केला आहे. सध्या तालुक्यातील ग्रामीण रुग्णालये आणि प्राथमिक आरोग्य केंद्रांमधील वैद्यकीय तपासणीचे नमुने सुमारे ४० किलोमीटर अंतरावरील वैजापूर, जिल्हा छत्रपती संभाजीनगर येथे पाठवले जातात. त्यामुळे तपासणीचे अहवाल मिळण्यास विलंब होतो आणि रुग्णांच्या उपचार प्रक्रियेत अडचणी निर्माण होतात.
आ. कोल्हे यांनी कोपरगाव ग्रामीण रुग्णालयाला भेट देऊन पाहणी केली असता, रुग्णांकडून तपासणीचे अहवाल वेळेत मिळत नसल्याच्या तक्रारी प्राप्त झाल्या.विविध आजारांचे निदान करण्यासाठी खासगी प्रयोगशाळांवर अवलंबून राहावे लागत असल्याने सर्वसामान्य नागरिकांवर अतिरिक्त आर्थिक भार पडतो. ही परिस्थिती लक्षात घेता, कोपरगाव उपजिल्हा रुग्णालयात ‘महा लॅब्स’ सुविधा सुरू करण्यासाठी आरोग्यमंत्री प्रकाश आबिटकर यांनी सकारात्मक निर्णय घ्यावा, अशी मागणी आ. कोल्हे यांनी केली आहे.
कोपरगाव ग्रामीण रुग्णालयाचे श्रेणीवर्धन होऊन त्याला उपजिल्हा रुग्णालयाचा दर्जा प्राप्त झाला आहे. तालुक्यात सात प्राथमिक आरोग्य केंद्रे आणि ३१ उपकेंद्रे कार्यरत आहेत. या आरोग्य संस्थांमध्ये उपचारासाठी येणाऱ्या रुग्णांची संख्या लक्षात घेता, उपजिल्हा रुग्णालयात अत्याधुनिक ‘महा लॅब्स’ सुविधा उपलब्ध होणे महत्त्वाचे आहे. ही सुविधा सुरू झाल्यास रुग्णांना स्थानिक पातळीवर विविध वैद्यकीय तपासण्या करून वेळेत अहवाल मिळू शकतील. त्यामुळे आजारांचे निदान लवकर होऊन उपचार प्रक्रिया अधिक सुलभ होण्यास मदत होईल. तसेच खासगी प्रयोगशाळांवरील अवलंबित्व कमी होऊन सर्वसामान्य नागरिकांचा वेळ आणि पैसा वाचू शकेल.
कोपरगाव तालुक्यातील नागरिकांना अपघाताच्या वेळी तातडीने उपचार मिळावेत आणि विविध आजारांच्या निदानासाठी आवश्यक तपासण्या स्थानिक पातळीवर उपलब्ध व्हाव्यात, यासाठी ट्रामा केअर युनिट आणि ‘महा लॅब्स’ या दोन्ही आरोग्य सुविधा महत्त्वाच्या आहेत. ट्रामा केअर युनिटसाठी मुख्यमंत्री देवेंद्र फडणवीस यांनी तात्काळ प्रस्ताव सादर करण्याचे निर्देश दिले आहेत, तर ‘महा लॅब्स’ सुरू करण्यासाठी आ. विवेक भैय्या कोल्हे यांनी आरोग्यमंत्री प्रकाश आबिटकर यांच्याकडे पाठपुरावा केला आहे. या दोन्ही सुविधांना मंजुरी मिळून त्या लवकरात लवकर सुरू व्हाव्यात, अशी अपेक्षा व्यक्त होत आहे.
