(अहिल्यानगर खबरबात न्यूज नेटवर्क)
अहिल्यानगर –“अंगदान जीवन संजीवनी अभियान 2025-2026” अंतर्गत जिल्हा शासकीय रुग्णालय आयोजित जनजागृती कार्यक्रमात डॉ. विठ्ठलराव विखे पाटील हॉस्पिटल, अहिल्यानगर यांनी उत्साहपूर्ण सहभाग नोंदविला.
डॉ. सुजयदादा विखे पाटील यांच्या मार्गदर्शनाखाली राबविण्यात आलेल्या या मोहिमेच्या प्रसारासाठी डायरेक्टर ऑफ मेडिकल डॉ. अभिजित दिवटे, डॉ. ब्रिगेडीयर अरुण त्यागी, वैद्यकीय अधीक्षक डॉ. सतीश देशपांडे, डॉ. सतिश मोरे, डॉ. प्रसाद काजळे, डॉ. अभिजित मिरेकर यांच्यासह संपूर्ण वैद्यकीय कर्मचारी कार्यरत आहेत.
अंगदानाबाबत जनजागृती वाढविण्यासाठी परिसरातील शाळा, महाविद्यालये, रुग्णालय कर्मचारी तसेच ग्रामीण व शहरी भागातील नागरिकांमध्ये विशेष कार्यक्रमांचे आयोजन करून जनसहभागावर भर दिला जात आहे. याच अनुषंगाने डॉ. विखे पाटील हॉस्पिटलच्या अवयवदान विभागाचे समन्वयक राज गिऱ्हे यांनी जिल्हा रुग्णालय आयोजित कार्यक्रमात मोहिमेची सविस्तर माहिती देत अंगदानाचे महत्त्व पटवून दिले.
हॉस्पिटलच्या माध्यमातून यापूर्वीही अनेक यशस्वी अवयव प्रत्यारोपण झाले असून, या उपक्रमाला जनतेचा उत्स्फूर्त प्रतिसाद मिळत आहे. कार्यक्रमादरम्यान अहिल्यानगर शहरात प्रभावी बाईक रॅली काढून नागरिकांना अंगदानाचे महत्त्व समजावून देण्यात आले.या प्रसंगी शासकीय रुग्णालयाचे वैद्यकीय अधिकारी, कर्मचारी, मेडिकल स्टाफ आणि नागरिक मोठ्या संख्येने उपस्थित होते.
