(अहिल्यानगर खबरबात न्यूज नेटवर्क)
लोणी – प्रवरा कृषी शास्त्र संस्थेतील विद्यार्थ्यांना कृषी शिक्षणाचे ज्ञान प्रात्यक्षिकातून मिळावे म्हणून संस्थेचे अध्यक्ष तथा जलसंपदा मंत्री ना. राधाकृष्ण पाटील यांच्या मार्गदर्शनाखाली शेडनेटच्या माध्यमातून रोपांचे उत्पादन तयार करण्याचा प्रकल्प कार्यान्वित केला आहे.
कृषी क्षेत्रातील नवनवीन तंत्रज्ञान विद्यार्थ्यांना शिक्षण घेतानाच मिळावे या उद्देशाने प्रवरा ग्रामीण शिक्षण संस्थेच्या मुख्य कार्यकारी अधिकारी डॉ. सुस्मिता विखे पाटील यांच्या संकल्पनेतून या शेडनेट शेती प्रकल्प सुरू करण्यात आला आहे. संस्थेचे संचालक डॉॅ. उत्तमराव कदम यांच्या मार्गदर्शनाखाली प्रकल्पातून रोपांची निर्मिती करून शेतकऱ्यांच्या बांधापर्यत पोहचविण्याची व्यवस्था करण्यात येणार आहे.
विद्यार्थ्यांना शेडनेट, पॉलिहाऊस मधील संरक्षित शेती बरोबर नवीन तंत्रज्ञान प्रत्यक्ष कृतीतून आणि त्यांच्या प्रायोगिक ज्ञानातून शिकता यावे विचाराने संस्थेने भव्य स्वरुपातील शेडनेटची उभारणी केली. मंत्री ना. विखे पाटील यांच्या वाढदिवसाचे औचित्य साधून या प्रकल्पाचा शुभारंभ करण्यात येणार असून, नव्याने उभारण्यात आलेल्या शेडनेट हाऊस मध्ये ढोबळी मिरची, रंगीत ढोबळी मिरची, झुकिनी आणि झेंडू लागवडीचा शुभारंभ प्रा.डॉ. सुस्मिता विखे पाटील यांच्या हस्ते करण्यात आला. यावेळी प्रवरा कृषी शास्त्र संस्थेचे संचालक डॉ. उत्तमराव कदम, प्राचार्य प्रा.दिलीप महाले, डॉ.निलेश दळे , डॉ. आशिष क्षीरसागर,प्राध्यापक, शिक्षकेत्तर कर्मचारी व विद्यार्थी मोठ्या प्रमाणात उपस्थित होते.
डॉ. सुस्मिता विखे पाटील म्हणाल्या, प्रवरेच्या माध्यमातून विद्यार्थी पदवी घेऊन बाहेर पडतांना तो तंत्रज्ञानाभिमुख असला पाहिजे. या दृष्टीने प्रत्येक महाविद्यालयात शिक्षण घेत असतानाच त्या शिक्षणासोबतच त्यांना वेगवेगळे कौशल्य प्रदान केले जाण्यासाठी पुढाकार घेण्यात आला आहे.जिल्ह्यातील यातून भविष्यामध्ये रोजगार निर्मिती आणि आपल्या आवडीच्या क्षेत्रात त्यांना करिअर करता येणार आहे. ज्या विषयात शिकले त्याचे सखोल ज्ञान त्यांना मिळून त्याचा उपयोग ते आपल्या व्यक्तिगत व्यवसायासाठी समाजासाठी करू शकतात.
कृषी संलग्नित प्रवरा कृषी शास्त्र संस्थेच्या माध्यमातून परिसरातील शेतकऱ्यांना नवनवीन तंत्रज्ञान हे उपलब्ध व्हावे, हा मानस मंत्री विखे पाटील यांचा आहे. त्यादृष्टीने प्रवरा कृषी शास्त्र संस्था मागील वर्षापासून वेगवेगळे उपक्रम आपल्या शेती क्षेत्रावर राबवून शेतकऱ्यांना त्याची माहिती देत आहे. येणाऱ्या काळात या संस्थेच्या माध्यमातून आंतरराष्ट्रीय कृषी संस्था सुरू करण्याचा मानसही त्यांनी यावेळी व्यक्त केला.
प्रारंभी डॉ. उत्तमराव कदम यांनी पद्मभूषण डॉ. बाळासाहेब विखे पाटील हायटेक प्रकल्पाची माहिती देत विद्यार्थी, प्राध्यापक आणि संस्थेतील कर्मचारी यांच्या संयुक्त विद्यमाने हा प्रकल्प येणाऱ्या काळात शेतकऱ्यांना चांगला दर्जेदार भाजीपाला, फळबाग, त्याचबरोबर फुलझाडांची रोपे संस्थेच्या माध्यमातून उपलब्ध करून देईल. शेतकऱ्यांना आपल्या शेतीमध्ये घेत असलेल्या वेगवेगळ्या पिकांचे तंत्रज्ञान हे प्रत्यक्ष कृतीतून बघता येणार आहे.
प्रकल्पाच्या माध्यमातून विद्यार्थ्यांना शेडनेट उभारणी,लागवडीसाठी बेड उभारणी, लागवड तंञ, खत, पाणी व्यवस्थापन,रोग-किड नियंत्रण, विक्री आणि पॅकिंग यांचे ज्ञान येथील प्राध्यापकांच्या मार्गदर्शनाखाली विद्यार्थी शिकत आहेत. यामुळे येणाऱ्या काळात प्रवरेच्या कृषी शास्त्र संस्थेत शिक्षण घेणारा विद्यार्थी हा सक्षमरित्या उभा राहण्यास मदत होणार आहे. त्याचबरोबर हा प्रकल्प परिसरातील शेतकऱ्यांसाठी हायटेक शेती तंत्रज्ञानाची माहिती देणारा ठरेल असेही प्रा. डॉ. कदम यांनी सांगितले.
