(अहिल्यानगर खबरबात न्यूज नेटवर्क)
शिर्डी – अशोक खरात यांचे निकटवर्तीय डॉ. जितेंद्र शेळके यांचा समृद्धी महामार्गावर झालेल्या भीषण अपघातात मृत्यू झाला आहे. या अपघातात त्यांच्या पत्नीचाही जागीच मृत्यू झाला असून त्यांचा मुलगा गंभीर जखमी झाला आहे. मिळालेल्या माहितीनुसार, हा अपघात पहाटेच्या सुमारास घडला. शेळके कुटुंबीय प्रवास करत असताना त्यांच्या कारने महामार्गावर उभ्या असलेल्या कंटेनरला मागून जोरात धडक दिली. धडक इतकी भीषण होती की वाहनाचा अक्षरशः चक्काचूर झाला आणि दोघांचा घटनास्थळीच मृत्यू झाला.
अपघातानंतर स्थानिक नागरिक आणि महामार्ग पोलिसांनी तत्काळ घटनास्थळी धाव घेत मदतकार्य सुरू केले. जखमी मुलाला तातडीने जवळच्या रुग्णालयात हलविण्यात आले असून त्याच्यावर अतिदक्षता विभागात उपचार सुरू असल्याची माहिती आहे. अपघाताच्या वेळी वाहनाचा वेग जास्त होता का, चालकाला डुलकी लागली का, किंवा कंटेनर रस्त्यावर निष्काळजीपणे उभा होता का, यासंदर्भात विविध शक्यता तपासल्या जात आहेत.
डॉ. जितेंद्र शेळके हे अशोक खरात यांचे अत्यंत निकटवर्तीय मानले जात होते. ते ‘शिवनिका ट्रस्ट’चे उपाध्यक्ष होते आणि सामाजिक तसेच व्यावसायिक क्षेत्रात त्यांचा मोठा संपर्क होता. संबंधित प्रकरणात ते महत्त्वाचे साक्षीदार असल्याचीही चर्चा होती. त्यामुळे या अपघाताकडे केवळ अपघात म्हणून न पाहता काहींकडून संशय व्यक्त केला जात आहे.
दरम्यान, या घटनेमुळे राज्यात मोठी खळबळ उडाली असून विविध राजकीय आणि सामाजिक स्तरातून शोक व्यक्त केला जात आहे. पोलिसांनी घटनास्थळी पंचनामा करून वाहनाचे अवशेष ताब्यात घेतले असून सीसीटीव्ही फुटेज आणि तांत्रिक तपासाच्या आधारे अपघाताचे नेमके कारण शोधण्याचे काम सुरू आहे. पुढील तपासानंतर या घटनेमागील खरी कारणे स्पष्ट होण्याची शक्यता आहे.
