(अहिल्यानगर खबरबात न्यूज नेटवर्क)
अहिल्यानगर : अहिल्यानगर जिल्हा मध्यवर्ती सहकारी बँकेची निवडणूक बिनविरोध करण्यासाठी राजकीय पातळीवर प्रयत्न सुरू असतानाच उमेदवारी अर्ज घेण्यासाठी इच्छुकांची मोठी गर्दी झाली आहे. नेत्यांच्या भूमिकेत एकसूत्रता नसल्यानेच मोठ्या प्रमाणात अर्ज घेतले जात असल्याचा दावा विधान परिषदेचे सभापती प्रा. राम शिंदे यांनी केला आहे.
जिल्हा बँकेच्या २१ जागांसाठी निवडणूक प्रक्रिया सुरू झाली आहे. २८ सप्टेंबरपासून उमेदवारी अर्ज घेण्यास सुरुवात झाली असून, दोन दिवसांत तब्बल ५४१ अर्ज नेण्यात आले आहेत. त्यामुळे बिनविरोध निवडणुकीच्या प्रयत्नांवर प्रश्नचिन्ह निर्माण झाले आहे.
याबाबत माध्यमांशी बोलताना प्रा. राम शिंदे यांनी संगमनेर येथे झालेल्या बैठकीचा संदर्भ दिला. या बैठकीबाबत नेत्यांमध्ये एकसूत्रता नसल्याने इच्छुकांनी अर्ज घेण्यास सुरुवात केल्याचे त्यांनी सांगितले.
संगमनेर येथील बैठकीला खासदार डॉ. सुजय विखे उपस्थित होते. मात्र, पालकमंत्री राधाकृष्ण विखे पाटील यांना या बैठकीची माहिती नव्हती, असे प्रा. राम शिंदे यांनी सांगितले. त्यामुळे नेत्यांमध्ये समन्वयाचा अभाव असल्याचे त्यांनी सूचित केले.
दरम्यान, जिल्हा बँकेची निवडणूक बिनविरोध करण्यासाठी विविध नेत्यांकडून प्रयत्न सुरू आहेत. सहकार क्षेत्रातील संस्था टिकवण्यासाठी सर्वांना सोबत घेऊन निर्णय घेण्याची भूमिका असल्याचेही प्रा. राम शिंदे यांनी सांगितले.प्रा. राम शिंदे यांनी कर्जत-जामखेड मतदारसंघातून उमेदवारी अर्ज घेतला आहे. उमेदवारी अर्ज दाखल करण्याची अंतिम मुदत ५ ऑक्टोबर असून, त्यानंतर जिल्हा बँकेच्या निवडणुकीचे चित्र स्पष्ट होणार आहे.
